Logo
Logo
  • MT
  • English

Stqarrija mill-Ministeru għas-Solidarjetà u l-Ġustizzja Soċjali, il-Familja u d-Drittijiet tat-Tfal: In-numru ta’ persuni li jiddependu fuq l-assistenza soċjali jinżel għall-anqas livell qatt reġistrat

06.08.2021 | Stqarrija

Numru ta’ Referenza: PR211482

In-numru ta’ persuni li jiddependu fuq l-assistenza soċjali fl-aħħar ta’ Lulju li għadda kien fl-anqas livell qatt reġistrat.  Saħansitra, dan kien anqas minn kemm kien immedjatament qabel bdiet il-pandemija.

Fil-fatt, filwaqt li t-total ta’ 6,743 persuna li fis-7 ta’ Marzu 2020 li kienu qed jirċievu l-assistenza soċjali, inklużi single parents u dawk li jieħdu l-għajnuna tal-qgħad, dan in-numru niżel għal 6,469 persuna fil-31 ta’ Lulju 2021 – tnaqqis ta’ 274 persuna. L-akbar tnaqqis kien reġistrat f’dawk li jieħdu l-għajnuna soċjali, b’163 persuna, filwaqt li dawk li jieħdu l-għajnuna tal-qgħad naqsu b’111-il persuna.

Dawn id-dettalji ingħataw waqt konferenza tal-aħbarijiet indirizzata mill-Ministru għas-Solidarjetà u l-Ġustizzja Soċjali, il-Familja u d-Drittijiet tat-Tfal Michael Falzon u s-Segretarju Permanenti Mark Musù.

Il-Ministru Michael Falzon qal li hu importanti li wieħed ifakkar li fl-2013 in-numru totali ta’ persuni li kienu jiddependu fuq l-assistenza soċjali kien ta’ 15,114 li jfisser li kien aktar mid-doppju li hu illum. Fil-fatt, mill-2013 ‘l hawn dan in-numru naqas konsistentament kull sena, eskluż għal perjodu qasir ta’ ftit xhur waqt il-pandemija, fejn kien hemm żieda zgħira, biex illum hemm 8,645 persuna anqas jiddependu fuq l-assistenza soċjali milli kien hawn fl-2013 – tnaqqis ta’ aktar minn 57%.

“Dan ifisser ukoll li issa l-qgħad niżel b’90% ta’ dak li kien tmien snin ilu, filwaqt li n-numru globali ta’ persuni dipendenti fuq l-assistenza soċjali, huwa anqas min-nofs ta’ dak li kien fl-2013. Dan kollu jkompli jagħmlilna kuraġġ sabiex inkomplu ntejbu l-livell ta’ għajxien tan-nies”, stqarr il-Ministru Michael Falzon.

Kif turi din it-tabella, mill-2013 ‘l hawn dawk dipendenti fuq l-għajnuna soċjali niżlu minn 10,784 għal 6,018 – tnaqqis ta’ 4,766 persuna (44.2%).  It-tnaqqis fl-għajnuna tal-qgħad kien saħansitra akbar perċentwalment, fejn minn 4,330 fl-2013 il-figura niżlet għal 451 – tnaqqis ta’ 3,879 persuna jew 89.6%.

Il-Ministru Michael Falzon qal li l-gvern se jkompli għaddej b’ħidma kontinwa favur il-familji Maltin u Għawdxin. Qal ukoll li bħalissa għaddejjin l-aħħar preparamenti sabiex il-ministeru jippreżenta sett ta’ miżuri soċjali li se jkunu ppreżentati fil-budget li jmiss sabiex jingħata s-sostenn lil kulħadd.

 

DIPENDENZA FUQ L-ASSISTENZI SOĊJALI 2013-2021

BENEFIĊJARJI TAL-ASSISTENZI SOĊJALI 2013 2014 2015 2016 2017   2018  2019  7 ta’ Marzu      2020  31 ta’ Lulju    2021
Għajnuna Soċjali 10,784 9,639 8,445 8,110 7,494  6,840  6,312  6,181  6,018
 Għajnuna għal Qgħad 4,330 3,791 2,570 1,391 939  766  613  562  451
TOTAL 15,114 13,430 11,015 9,501 8,433  7,606  6,925  6,743  6,469
Font Resize